تنزيل لعبة ببجي موبايل PUBG MOBILE على الكمبيوتر او اللاب توب مجانا

خطوات بسيطة ستجعلك من المتفوقين | تحفيز للدراسة والتفوق

إن كنت تبحث عن تحفيز للدراسة يشحنك بطاقة إيجابية تدفعك نحو التفوق والنجاح فهذه المقالة لك. مقالة تحفيزية للدراسة باللغة العامية قصيرة من تقديم خالد عبيدات.

راح نحكي في هذه المقالة عن موضوع كثير مهم للجميع وتعكسه على حياتك , وراح نحكي أيضاً في هذه المقالة عن أكبر وأخطر عدو يقف في وجه التفوق والنجاح في دراستك ويجب هذا العدو تتجنبوا وتعرفوا كثير وتجهز نفسك حتى فعلاً تقدر تتخطاه أو تقدر تواجهوا , وراح نحكي أيضاً نصائح سريعة وفعالة راح تساعدك إنك تركز في دراستك وتحفز نفسك للدراسة .

من أكثر العوامل الي تخلينا نأجل ونبعد عنها هي مناهجنا الدراسية , يعني مناهجنا الدراسية تعتمد بشكل كبير على حشو المعلومات , ما فيها أشياء بتحفزنا حتى ندرسها , وأكون معك صريح هي فعلاً مرحلة وبدنا نعديها سواء إنت بالمدرسة أو بالثانوية العامة أو في الجامعة بكالوريوس ..ماجستير ..دكتوراه ..وين ما كنت هالمرحلة راح تعدي , عادي جداً بصراحة وهذا الشعور كثير ناس بمر في وأنا يمكن كنت منهم لما كنت أدرس في الجامعة , بتحس المناهج بتشتغل ضدك وهو شعور عادي لا تخاف لا تحس حالك أقل من غيرك أو غيرك أشطر وأذكى منك , مناهج معقدة شو بدك تعمل بس أتعامل معها مش أكثر عشان نكون واضحين , ولا تفكر بالموضوع كثير إنت عندك مرحلة راح تمر لا تزعل ولا تتنكد ولا تحبط وجميعنا بنقدر وجميعنا رائعين ومميزين.

خلينا نحكي الآن عن أكبر عدو أمام التفوق والنجاح في الدراسة , أكبر عدو بواجهنا جميعنا بموضوع الدراسة هو المقارنة , لما تبلش تقارن حالك مع غيرك ولما تبلش تقارن حالم مع الأول في الفصل أو الأول على الصف وتحس انه إنت أقل من غيرك , مباشرة لما تقارن حالك مع غيرك راح تحس حالك أقل وهون راح تحبط.

إياك تقارن حالك مع أي حدا ثاني , خلص سيبك من كل العالم لا تقارن حالك مع حدا ولو أجا حدا يقارنك مع حدا احكيلوا معلش خلص ما بدي أسمع , إنت إنسان مختلف وإنتي إنسانة مختلفة وكل واحد فينا مختلف عن الآخرين .

خصوصاً في نهاية الفصل الدراسي لما تبلش تحس انه إنت ملحوق بالوقت وتبلش تطلع على زملاءك الي متابعين بعضهم من البداية أو الي بتظاهروا انه همه متابعين من البداية وعلى فكرة في ناس بكذبوا بالموضوع , خلينا نكون واقعيين في كثير كذا بهذا الموضوع بين الزملاء عشان يغيضوا بعض وعشان يوقعوا بعض بالفخ انه أنا بدي أخلي غيري ما يدرس بدي أتظاهر يا انه أنا دارس كثير أو انه أنا مش دارس وأنا الذكي وفجأة مش عارف شو بدي اعمل وبروح والا هو جايب علامة كاملة , خلص لا تقارن نفسك مع حدا ركز إنت بينك وبين نفسك , المقارنات سلاح دائماً بشتغل ضدك .  

كيف بدنا نتعامل مع هذا الموضوع ؟؟

أول شي إعرف حالك اعرف نفسك ..متى بتحب تكون تعرف تدرس؟.. متى الوقت الي بتحب تدرس في ؟.. شو هي الطريقة الي بتحب تدرس فيها؟.. اعرف قدراتك واعرف نفسك منيح , إذا إنت مش عارف نفسك ومش عارف الوقت الي بتكون متحمس في . في ناس في الصباح في ناس المسا بالليل بعد نص الليل , جميع الناس بتختلف عن بعض , فإنت اعرف بالضبط متى أفضل وقت مناسب إلك للدراسة.

اعرف شو بدك؟ .. اعرف شو بدك من الدراسة , يعني هل بدرس هاي المادة عشان أحفضها وأجيب فيها علامة فوق التسعين.. فوق السبعين.. أنجح فيها , ايش هدفك من الدراسة وايش هدفك من هاي السنة وإنت وين رايح وإذا إنت في المدرسة شو التخصص الي بتطمح له وايش المعدل الي لازم تجيبوا حتى تدخل هذا التخصص , اعرف نفسك واعرف شو بدك عشان تعرف إنت وين رايح .

اعرف انه إنت بمرحلة راح تعدي , أنظر من حولك .. أهلك واخوانك ..قرايبك ..أصحابك .. راح تعدي , جميع الناس بمروا بالمرحلة هاي وبتمشي فما تحس انه إنت عليك ضغط كبير يمكن الأهل شوي الله يسامحهم بضغطوا الأبناء عشان أكيد مصلحة الأبناء , يمكن الأهل ما بعرفوا طريقة ثانية للتحفيز إلا انه احنا نبقى نضغط ونزن ونزن .. لأنه ما تعلموا وما بعرفوا غير هيك ولا تلومهم ولا تحزن كثير , وبالمناسبة الدراسة والجامعة وهذه الأشياء ما في اشي اسمه مرحلة مصيرية (ما في اشي مرحلة بتقرر مصيرك) , كثير ناس بدخلوا تخصص بالجامعة وبعدين بغيروا التخصص , في ناس دخلوا طب وجابوا معدلات عالية بالثانوية وبعد هيك دخلوا تخصص برمجة مع أنه البرمجة بدها معدل أقل بكثير من الطب بس هو خلص هيك شغفوا هيك حاب , فما في مرحلة بتحدد حياتك وإنت بكل لحظة بتقدر توخذ قرارات تغير مسار حياتك .

الدراسة جميلة وحلو إحنا نكون متفوقين من الجيد إنك تجيب علامات عالية وإنك تدرس وتتعلم أشياء جديدة بس مش آخر المطاف "مش نهاية العالم" هاي المهم نركز عليها , الموضوع ما بخوف إحنا بنعمل منه وحش كبير بخوفنا .

رسالة نوجهها للأهل إلي عندهم أولاد أو بنات في المدارس أو الجامعات سيبوهم بحالهم لا تضغطوهم أكثر ما همه مضغوطين من الدراسة والعبء الي عليهم , إذا انتوا مش قادرين تريحوهم لا تضغطوهم , هاي رسالة كثير مهمة لا تضغط أولادك , هو عارف انه لازم يدرس ..عارف انه لازم يشد حيلوا .., بس تعال طبق على أرض الواقع "مش هيك بنحفز أبناءنا" ومش هيك بنحفز حالنا.